Eedogan Oo Munaafaqiin Ku Sheegay Dawladaha Reer Galbeedka, Ka Dib Afgembigii Dhicisoobay

Ankara (HMN) – Madaxweynaha Turkiga, Rajab Tayib Erdogan ayaa ku eedeeyay waddamada Galbeedka munaafaqnimo, xilli Maanta uu dalkiisa xusayo sanad guuradii koobaad ee kasoo wareegtay isku-dayga afgembigii fashilmay.

Madaxweyne Erdogan oo maqaal ku qoray wargeys ayaa sheegay in aanay wax marmarsiyo ah haysan dalalka saaxiibka la ah Turkiga ee sugay inta ay ka kala caddaanayso xaaladda isku-daygii afgembi.

Waxa uu intaa ku daray in dalalka qaar ay magangelyo siiyeen xulafada Fethullah Gulen, oo ah wadaad fadhigiisu yahay Maraykanka, Erdogan-na uu ku eedeeyay inuu ka dambeeyay falkaasi.

Madaxweynaha ayaa sidoo kale ku gacan-saydhay eedeymaha ah in xukuumaddiisa ay gacan bir ah ku qabatay dadka lagu eedeeyay inay ku lug lahaayeen isku-daygaasi afgembi.

Dalka Turkiga waxaa Maanta ka dhacay munaasabado dhowr ah oo lagu xusayo sanad guurada koobaad ee kasoo wareegtay isku-daygii afgembi ee ka dhanka ahaa madaxweyne Rajab Tayid Erdogan.

15-ka July ayaa waddankaasi looga asteeyay maalin fasax qaran ah, iyadoo la xusayo dhacdo uu madaxweyne Erdogan ku tilmaamay mid bededshay taariikhda Turkiga.

Madaxweynaha ayaa shir guddoomiyey kulan gaar ah oo uu baarlamaanka Turkigu yeeshay, ka hor inta aanu magaalada Istanbul kaga qeybgalin isu soo bax lagu qabtay buundada Bosphorus, halkaasi oo dad diiddan isku-dayga afgembi ay habeenkii 15-ka July 2016 kaga hortageen askartii fulinaysay.

Xukuumadda Ankara ayaa soo saartay wareegto ay shaqada kaga ceydhisay in ka badan toddobo kun oo isugu jira saraakiil booliis ah, xubno dowladda ka tirsan iyo aqoonyahanno.

Ankara ayaa ka dooneysa Maraykanka inuu Turkiga ku wareejiyo wadaadka Fethullah Gulen, oo ay sheegtay inuu ka dambeeyay isku-daygaasi afgembi.

 

Madaxweyne Erdogan ayaa dalbaday in marnaba aan wax damqasho ah loo muujin kuwa shaqada laga tiray.

La Share Garee Asxaabtaada

Comments are closed.