Raysal-wasaarihii Pakistan Oo Iscasilay Markii Maxkamadi Sheegtay Inaanu Xilka U Qalmin

Pakistan (HMN) – Ra’iisal-wsaaraha dalka Pakistan, Nawaz Shariif ayaa xilka iska casilay ka dib markii maxkmadda ugu sarreysa dalkaasi ay go’aamisay inaanu u qalmin sii haynta xilkaasi.

 Baadhitaanka ayaa lagu sameeyey hantida qoyska Nawaz Sharif, kadib markii sanadkii 2015-kii ay soo baxday “cadaymihii Panama”, taasi oo lagu sheegay in qoyska ra’iisal wasaaruhu ay ku lug leeyihiin shirkado ku yaalla dalka dibaddiisa.

Sharif ayaa si joogta ah u beeniyay eedaymaha loo jeediyay.

Waa kuma Nawaz Sharif ?

Garsoorayaasha Maxkamadda oo ka kooban 5 qof ayaa si wada jir ah ugu dhawaaqay go’aanka. Waxaana aad loo adkeeyey ammaanka guud ee caasimadda Islamabad.

Ejaz Afzal Khan oo kamid ah garsoorayaasha kiiskan qaaday, ayaa sheegay in Nawaz Sharif aanu sii ahaan karin xubin sharafeed kamid ah Baarlamaanka.

Wasiirka arrimaha gudaha Pakistan Chaudhry Nisar Ali Khan, ayaa u jeediyay ra’iisal wasaaraha in uu aqbalo xukunka maxkamadda.

Maxkamadda ayaa baadhitaan ku haysay tiro dad ah oo uu ka mid ah yahay Nawaz Sharif, gabadhiisa Maryam iyo saygeeda, wasiirka ganacsiga iyo xubno kale oo dawladda ka tirsan.

Nawaz Sharif ayaa dhowr jeer ra’iisal wasaare kasoo noqday Pakistan, laga soo bilaabo 1990-kii. Waxaana sanadkii 1999 xilka looga tuuray afgembi aan dhiig ku daadan.

Ma jiro ra’iisal wasaare rayid ah oo dalka Pakistan soo maray oo xilka si nabad ah ku dhamaystay muddo shan sano ah.

 

 Hormoodnews.com/Hargeysa Office

La Share Garee Asxaabtaada

Comments are closed.